Die Schuale tuat die Tir‘n auf, nit jeder Schualar gfreit sich drauf,
im Gegenteil die Mamas sehr, wenn nur der Einkaufsstress nicht wär.
Sie g‘schwind in ålle Ladn rennt
und kafft und zåhlt, dass der Geldbeit‘l brennt.
Is Kind natirlach nebenbei, bestimmt wås „in“ und wichtig sei.
Blöcklan, Taschlan, Stifte, Sticker, Waxmalkreid‘n,
die Kinder sein fein nit bescheid‘n.
Die Mama moant, ob‘s dös åll‘s brauch?
Jå freilach, – Lis und Katl homm‘s auch.
Fei hoagl is a beim Gewånd, adrett und lässig sein‘s beinånd,
weil jeder Biez mit 6 Jåhr woaß, was Calvin Klein, Nike
und Only hoaßt.
Die Mama hot åll‘s durchgecheckt, in best‘n Schualweg ausgeheckt,
is Kind soll ja koan Schåd‘n hob‘n und ach koa Schualstress solltat‘s plåg‘n.
Fest homm‘se boade åll‘s im Griff, die Lötz‘n sein heit so viel wiff!
Früchte, Nüsse, Pancakes,Schualmaus o wie fein,
kimmt in die Jausenbixe drein.
Für ålle Kinder soll dös a Power-„Neunar“ sein.
Sein sie amoll nit går so gscheit,
wer woaß, ob nit dia Schualmaus ihnen a Weisheit eingeit.
I muass mi iatz mit den Gedånk‘n tråg‘n,
wia is miglach, dass mir eppas derlearnt hobn.